Natersch, miis Derfji
Zwischum Simplon und der Belalp, da lits.
We mu will, öi zwischu Birgisch und Bitsch.
Da wa der Chelchbach ds Wasser in du Rottu treit,
wa der Aletschgletscher ds’Ändi geit.
Natersch, miis Derfji, am Rottustrand.
Mu griesst schich immer, mu kennt halt enand.
Hie läbunt wirklich no urchigi Lit.
Wies suschter nummu sältu no git!
Natersch, miis Derfji, dü bisch voll Gägusätz.
Halb Stadt, halb es Derfji, hie bin ich sicher nit lätz!
Natersch, chleis Derfji,
und doch so gross wie en Stadt.
Doch hoffuntli blibsch es Derfji,
susch wäris wirkli sinduschad!
D’Alterssidlig, näbum Chindergartu züe.
Im altu Derfji, ja da findusch no Rüeh.
An der Furkastrass, da rollt der Vercheer,
Jahr fer Jahr es bizji meh.
Super-Discount-Lädu, en alte Konsum,
uberall träffunt schich Alt und Jung.
Bim Beihüüs merksch, das ds’Läbu vergeit.
In de Beize gschpirsch no Läbunsfreid!
Natersch, miis Derfji......
Dü geisch mer uf du Wecker
Giboru het mi d’Mamma, da is scho passiert:
Uf ds Fitla schlaat d’Hebamma, ich hä ganz lüt gibrielt!
Hä mich nit chennu weru, das häni nit vertreit!
Hett’ ich schon chennu redu, uh dera hettis gseit:
Dü geisch mer uf du Wecker
dü geisch mer uf du Geischt!
Dü geisch mer uf du (Brrrr...),
gat nummu das sus weischt!
Ich bi dernaa als Schieler, nie der Beschtu gsii,
ich weiss emal en Lehrer, isch gar nie zfridu gsii.
Är het mich gar nit megu, är het mier gar nix gscheicht.
Ich hä nix derfu sägu, ich hämers nur gideicht:
Dü geisch mer uf du Wecker...
Im Militeer da heinsch mit mier, gar nix chennu machu
der Kadi der bifählut mier, ich hä nur miessu lachu!
Ich will mich amüsieru, der Kadi het kei Freid!
Ich selle jetz parieru! Da hän ich ihm nur gseit:
Dü geisch mer uf du Wecker...
Ich will ds Auto parkieru, und hä keis Minz derbii.
Ich tüe gottlos pressieru, da chunnt scho d’Polizii.
Ich cha nimme istiigu, will da der Tschugger steit!
Är will z’eerscht ds Verbal schriibu, da hän ich ihm nur gseit:
Dü geisch mer uf du Wecker...
Ich müess wägs miinum Zahntweh, emal zum Zahnarzt gah.
Der lüegt ins Müül, seit:”Z’Juchhee, ich fah mit Boru a!
Hoffuntli bisch brave, ds Boru macht mier Freid.
Ich gah bis ambri uf d’Närve!” - Da hän ich ihm nur gseit:
Dü geisch mer uf du Wecker...
Ich hä wellu heiratu, en ganz en hibschi Fröi.
Doch willsch mer alls verbietu, dsMüüsig machu öi!
Schii chunnt schnäll iifersüchtig, wenn en andri verbiigeit.
Jetz bin ich wieder alleinzig, denn ich hä züera gseit:
Dü geisch mer uf du Wecker...
Ich bi wahn ich bi gschtorbu, ambrüf inu Himmul cho.
und vor der Himmulsporta, wartut der Petrus scho!
Är nimmt schiis gross Büech fircha, was da fer mich dri steit.
“Nei, dü chunnsch nit vericha!” -Da hän ich ihm nur gseit:
Dü geisch mer uf du Wecker...
Es Munzi
Fer es Munzi va dier, da sing ich z’allerschönschti Lied fer dich.
Fer es Munzi va dier, da nimm ich drissig Kilo ab fer dich.
Fer es Munzi va dier, schwimm ich zu dier uber du Ozean.
Fer es Munzi va dier, lahn ich sogar es frischus Bier la stah!
Es Munzi va dier, isch ds Schönschta was git,
nur es Munzi va dier, meh will ich nit.
Es Munzi va dier, chumm gimmer schnäll eis.
Fer es Munzi va dier, da mach’ ich alles was mer seisch!
Fer es Munzi va dier, zahl ich dier miine Lottosägscher üs.
Fer es Munzi va dier, rüüm ich sogar emal diis Zimmer üf!
Fer es Munzi va dier, äss ich kei Chnoblöich-Pizza niemals meh.
Fer es Munzi va dier, da triich ich nummu no Kamillutee!
Es Munzi va...
Fer es Munzi va dier, chöif ich fer dich der schönschti Ring was git
Fer es Munzi va dier, da löif ich hundert Kilometer wit.
Fer es Munzi va dier, ziehn ich va Natersch wäg und gah uf Brig.
Fer es Munzi va dier, nimm ich in d’Ferie diini Müeter mit!
Es Munzi va...
Gong-Song
Der Otti der isch ds China und jetzu bringt är mier
en Gong va China, scheicht mier das als Feriusouvenier.
Jetz lüeg ich uf du Gong, wan ich vam Otti hä vercho,
drum bin ich pletzli uf d’Idee va dischum Liedji cho:
Diz isch der Gong-Song (GongSongGongSongGongSong)
und machuts “GONG!” - de tüet das weh!
Diz isch der Gong-Song (GongSongGongSongGongSong)
Oh jeemineh!
Wie us Chibla het das gschifft bim Frindschaftsfüessballmatsch.
Ich bi im Gool, äs isch so nass, ich stah im greeschtu Gätsch!
Äs git Penalty gägu mich, und trotzdem gits keis Gool.
Mu schiesst mier z’mitscht uf miine Grind und ich gah k.o.!
Diz isch der Gong-Song...
Nächti hets es Fäscht gigäh, äs isch enz luschtig gsii.
Gsungu und gitrüüchu heiwer, Bier und Schnaps und Wii.
Am Füüfi bin i de ins Bett, am Sibni lituts scho
und wills der Grind mier fasch verjagt, gahn ich wieder k.o.!
Diz isch der Gong-Song...
Guggumüsig
Ich losu Schlager und Dixieland
oder en urchige Ländler.
James Last mit schiiner Superband,
wenn’s sii müess öi Opernsänger,
oder alls wa gat im Radio chunnt,
mier macht jedi Müsig Freid,
doch wenn de wieder d’Fasnacht chunnt,
steit no’n andri Müsig bireit:
Ja wenn die Guggumüsig, schränzt schön grüüsig
bricht es Fieber üs.
Äs stigt bi dr Guggumüüsig, der Puls uf tüüsig
ich flippu komplett üs.
Ich tanzu derzüe und ich singu derzüe
und stampfu derzüe no mit miinum Schüeh.
Ich gumpu derzüe und ich höiru derzüe
bis am andru Morgu früeh!!
Äs git Lit die sägunt: “Das isch doch nur Krach,
das teent ja furchbar grüüsig!”
Mu keere ja die ganzi Nacht
nur no Guggumüsig.
Schii welle schlafu und iri Rüeh
das teene furchbar leid.
Doch dene briel ich allne züe:
“Guggumüsig, das macht doch Freid!!”
Ja wenn die Guggumüsig,..
Strahlundi Öigu
Dü chochusch mier z’Nacht,
mit Vorspiis und Dessert.
Dü weisch wie mus macht,
das cha niemer besser.
Dü brüüchusch vill Gschirr
und ich solls abwäschu!
Doch ich sägu zu dier:
“Das chasch de vergässu!”
Ich sägu zu dier:
“Das chasch sälber abwäschu!”
Doch nachher lüegsch dü mich a
mit diine strahlunde Öigu.
Dü weisch ich gibu dier nah,
äs isch nit zum glöibu.
Dü wicklusch mich jedesmal
um diine chlei Finger.
Lüeg mich doch nimme so a,
so verwitschusch mich immer!
Dü geisch ines Gschäft
es Chleid ga probieru
mier chunnt pletzli schlächt,
der Priis tüet schockieru.
Fascht achthundert Stei
nei, das isch doch gschtohlu.
Doch ich sägu dier:”Nei!
Das tüenter nit zahlu!”
Ich sägu dier:”Nei!
Das chasch der sälber zahlu!”
Doch nachher...
Ich lachu eifach gäru
Wie trüürig wäri z’Läbu, ohni Gschpass und Freid!
Das wellti ich nie erläbu, ja das wäri wirklich leid!
Schich immer Sorge machu, das tüet doch gar nit güet.
Ich tüe vill lieber lachu, das ligt in miinum Blüet!
Ich lachu eifach gäru: Hahahaha
Ich zeigu d’Freid halt gäru: Hahahaha
Ich lachu eifach gäru, will ich so Gschpass hä dra
Ich zeigu d’Freid halt gäru, das miesst ier doch verstah.
Ich lachu eifach gäru, will ich so Gschpass hä dra!
Ich darf kei Witz verzellu, susch kii ich immer dri.
Denn mitti im Verzellu, da chunnt mier d’Pointa z’Sii.
Ich fah sälber afa lachu und das zimmli lüt.
Dum Witz cha niemer nah cho, nei mu bigriift nu nit.
Denn ich lachu eifach...
Warum bisch dü so zfridu, het mu mich scho gfrägt.
Dü bisch wirkli z’biniidu, was isch diis Gheimrezäpt?
:
Ich lachu...
Konsärvubichsemenüfröije
Am Morgu so am Niini,
geit diini und öi miini
Fröi ins Tea-Room i.
Schii bschtellunt schich es Teeli
verzellunt schich ganz freeli
die niwwschtu Gschichtjini.
Die Zit tientsch ganz vergässu
bald wäris Zit zum Ässu,
doch z’Mittag steit no nit bireit.
Doch schii lähnt schich nit la steeru,
schii heint deheimu “Hero”
schii wissunt dass das ganz schnäll geit!
REFR:
Bi de Konsärvubichsemenüfröije;
pünktlich steit dier z’Ässu uf dum Tisch.
Ja die Konsärvubichsemenüfröije
die zöibrunt ds’beschtusch Ässu uf du Tisch!
Am Namittag gänsch wieder
ins Tea-Room schnäll veruber,
schii heint schich telefoniert.
Äs git sovill z’verzellu
no schnäll es Kaffee bschtellu,
d’Wirti heiges offeriert!
En Linzertorta ässu,
d’Niidla nit vergässu
no schnäll churz vor dum z’Nacht.
Deheimu wartut z’Mannji,
macht Hörnli schich im Pfannji
derbii wäri z’Nacht schnäll gmacht!
REFR:
Bi de Konsärvubichsemenüfröije....
Doch d’meischtu Männer steert das nit.
D’Höiptsach isch doch dass ne eppis z’Ässu git.
Und git schich d’Fröi mal ehrlich Mieh,
es Komplimänt verchunnt schii darfer nie,
nei nie!
REFR:
Drum gits die Konsärvubichsemenüfröije.....
Nana na Ole
Na na nanana, Ole!
Na na nanana, Ole!
Yeah, Yeah, Yeah, Yeah, Okay!
Tüesch dü es Liedji singu,
mit me güetu Tegscht.
Das tüet dier gar nix bringu,
willt de gat sofort merksch:
Lieder zum Naadeichu,
die chämunt gar nit a!
Dü müesch der s’was üsdeichu,
wa jede singu cha!
Mu müess sus chennu höiru,
scho nah dum eerschtu Mal!
Na na nanana, Ole!...
Amne Lied es Jahr studieru
bis dier alls üfgeit.
Dernaa tüesch dich blamieru,
will mus nit versteit.
Doch singusch dü de Lieder,
wa jede singu cha.
Das keerunt alli lieber,
mit dem chunnsch besser a.
Mu kennt sottigi Lieder,
scho nah dum eerschtu Mal!
Na na nanana, Ole!...
