... so va Jahr zu Jahr ...
1960
Z`Hansrüedi chunnt am 21. März uf d`Wält.
Schiini zweijährige Schweschter Helga gfrewwt schich an dum niwwu Brüederli.
1961
Ds Landi chunnt uf d`Wält!
1962
Z`Hansrüedi git schiis Nuggi ab!
1963
D‘Giburt vam Erich am 18. Oktober
1964
D‘eerscht Operation: Liischtubruch
1965
Z‘Hansrüedi geit in d‘obligatorisch Italienerschüel bim hittigu Zentrum Missione.
1966
Im Chindergartu bim Fröilein Brunner
1967
Z‘Hansrüedi geit jetz in d‘Primarschüel.
Ds Fredy chunnt uf d‘Wält.
1968
Bim Lehrer Ruppu iner zweit Klass. Erschtkommunion.
1969
Dr erscht Kontakt mim Fernseh! Graffissimo-Final ds Natersch mit dum Klassulehrer Hanspeter Schmid, der Nella Martinetti, dum Heino und de Les Humphries Singers.
1970
D‘eerschtu Handorgel-Stunde bim Stabinger Hildi. Mim Lehrer Jossu iner viertusch Klass.
1971
Dr eerscht Üftritt mit dr Handorgla iner Schüel bim Lehrer Sieber. Mit dum Brüeder Landi und dum Vater Ruedi wird flissig giebt! Hienta gits sogar chleini Üftritta uf dr Strass.
1972
Sägschti Primarklass mim Lehrer Ritz. Handorgle-Stunde mim Hugo Scheuber.
1973
Sekundarschüel ds Natersch.
1974
Orientierigs-Schüel ds Natersch. D‘eerschtu öffentlichu Üftritta mit dr Kapelle Zbinden.
1975
Dr eerscht „Zbindi-Aabu“ im Café Amherd ds Glis wird en Riesu-Erfolg!
1976
Z‘Hansrüedi wird Fahnuschwinger und faht d‘Lehr als Velo- und Töffmech bim Holzi ds Glis a.
1977
A hüüfu Angaschma mit dr Kapelle Zbinden im Oberwallis. Z‘Hansrüedi faht iner LONZA mit dr Mechaniker-Lehr a.
1978
D‘Kapelle Zbinden tourt mit dr Zerzuben Reiseshow durch ds ganz Oberwallis. Iner Fasnacht trättut Z‘Hansrüedi ds eerschtmal als Alleinunterhalter üf und grindut d‘eerscht Schnitzulbankgruppa.
En Höhepunkt: Als Fahnuschwinger am Umzug bim Eidgenössischu Jodlerfäscht in Schwyz.
1979
Ds bescht Jahr va dr Kapelle Zbinden. Sogar Üftritta iner Üsserschwiz und im Üsland. Z‘Hansrüedi wird in du Vorstand va de Weschtschwizer Fahnuschwinger gwählt. Grindig va dr Schnitzulbankgruppa Chääsmade (de heissuntsch no „Red Rose Chruchtule“).
1980
Mit dr Kapelle Zbinden bim eerscht Zerzuben-Festival in Portoroz.
Z‘Hansrüedi gwinnt ds eerschtuschmal der Oberwalliser und der Weschtschwizer Fahnuschwinger-Wanderpriis.
1981
Z‘Hansrüedi bschteit d‘Lehr als Mechaniker, macht d‘RS als Panzergrenadier und chöift schich d‘eerscht elektronisch Handorgla, en tiiri Farfisa. Dr eerscht Üftritt unner dum Namu „Z‘Hansrüedi“. Är gwinnt zum eerschtu Mal fer du WSJV der Eidgenössisch Fahnuschwinger-Wanderpriis.
1982
Z‘Hansrüedi het meh Üftritta als Alleinunterhalter als mit dr Kapelle Zbinden. Zerzuben-Festival in Lloret de Mar.
1983
D‘Kapelle Zbinden heert üf! Z'Hansrüedi ischt fascht jedes Wuchunänd als Alleinunterhalter unnerwägs.
1984
D‘Kapelle Zbinden nimmt naaträglich no en Kassetta üf.
1985
„Fasnächtigs und anners“ - d‘eerscht Kassetta wird bim Zuber ds Brig üfgnu. Eerschte Isatz als Kampfrichter bi de Fahnuschwinger.
1986
D‘Kassetta „Säich und anners“ nimmt Z‘Hansrüedi deheimu mit eme Kassettu-Tonband(!) üf.
Fer sumi isch das immer no ds Beschta wa Z‘Hansrüedi je gmacht het! Z‘Hansrüedi gwinnt zum zweitumal der Eidgenössisch Wanderpriis.
1987
D‘eerscht Single „Occasion“ wird im Lenox-Tonstudio üfgnu. Mit dera chunnt är zeerschtuschmal im Radio DRS. Z‘Hansrüedi produziert d‘Kassetta „Occasion und anners“ und müess handcherum es bizji mit de Üftritta brämsu - d‘Arbeit im Cheminée- und Chachelofugschäft liidut suschter z‘fascht. Är ischt öi im OK vam Eidg. Jodlerfäscht Brig.
...als Profimüsiker...
1988
Z‘Hansrüedi heert üf schaffu, wird Profi und produziert gat zwei Kassette: Näbu „Gschpass und anners“ öi no „Wienächtigs und anners“. D‘eerschtu Üftritta mim Art Furrer uf dr Riederalp.
1989
Uber 280 Üftritta nummu im Oberwallis! Rheinschiffahrt mit dum Duo Sepp Trütsch / Vic Eugster. Produktion va de Kassette „Fer Pfigsch“ und „Zbindini - Die Erste“.
1990
D‘eerschti CD „Ich bi Walliser“ wird mit bi de ACTIV-Records (Trio Eugster) produziert. MC „Zbindini - Die Zweite“. Glückspost-Rheinschifffahrt mit Vreni und Rudi. Vili Live-Üftritta fer ds Radio DRS.
1991
Mittelmeer-Chrizfahrt an d‘Wältüsstellig Sevilla. Üftritt im Fernseh bi dr eerscht Musig-Plausch-Sändig mim Sepp Trütsch. D‘Fasnachts-Kassetta „D‘Challini“ wird produziert. Nummu no d‘Hälfti va de Üftritta im Wallis.
1992
CD „Allergattig uf Wallisertitsch“ chunnt bi de ACTIV-Records üssa.
1993
Z`Hansrüedi het uber achzig Prozänt va de Üftritta iner Üsserschwiz. Ds Schwizer Fernseh dräjut uf dr Belalp dr Müsig-Clip „Dr Boozu“.
1994
Die CD „Fäschtet!“ wird produziert. Üftritt bim Samschtig-Jass mit dum Jürg Randegger.
1995
Die CD mit uralte Walliser-Lieder macht Z`Hansrüedi wieder alleinzig. „Nennt mir das Land... Vol. 1“ wird en flotte Erfolg im Wallis. Z`Hansrüedi chunnt in du Final bi dr „Gala des Schweizer Schlagers“ und darf im Fernseh eis ga singu. Öi im Samschtig-Jass. Hochzit mit Karin ds Las Vegas.
1996
Fernseh-Üftritt im „Top of Switzerland“ uf dum Torränt. D`eerschti grossi Zeedeetöifi uf dum Eggishooru mit dr Irma Dütsch und dum Michel Jordi. Die CD „...im Ethno-Fieber“ isch d`eerschti sälber produzierti Produktion. Mim Audi Mario het Z`Hansrüedi fachkundigi Hilf gfundu!
1997
Z‘Hansrüedi spillt bi de üsgwandrute Walliser in San Jeronimo Norte (Argentinien).
Die CD „Karaoke“ intressiert (fascht) niemer....
1998
Die Doppul-CD „13 Stärna“ chunnt uf du Märt. D‘eerscht Produktion wa üsschliesslich mit Live-Müsiker produziert wordu ischt. Zweitägigi Zeedeetöifi im Aletschgletscher.
1999
Üftritta in Singapur und Kuala Lumpur. In der Tony Marshall-Show singt Z‘Hansrüedi ds Lied „13 Stärna“. Die Üfnahme mächuntsch ds Montana-Crans. Die Schnitzulbankgruppa „Üfheeru!!“ trättut ds eerschtmal üf.
2000
Driitägigs Zeedeetöififäscht in Oberwald und Gletsch fer die CD „Rottu“. D‘eerscht offizielli „Z‘Hansrüedi-Schiff-Fahrt“ uf dum Mittulmeer. Bi dr allerletscht „Risiko“-Sändig uf SF1 gwinnt Z‘Hansrüedi mit dum Lied „Alles immer numma no mit dier“ das goldig „Murmulti“.
2001
Z‘Hansrüedi spillt bim Jubiläums-Zerzuben-Festival in Kirchberg im Tirol und töifut da die CD
„Miini Lieder“.
2002
Z‘Hansrüedi-Flussfahrt va Passau uf Budapest, en niwwi CD (Natersch) und es längs Zeedeetöififäscht ds Natersch.
2003
Z‘Hansrüedi (uberzigte Nichtsportler und Anti-Schgiifahrer) organisiert en Karwingwucha (!)
ds Andermatt.
2004
CD‘s „Nennt mir das Land...Vol.2“ und „Livemüsig im Mattmarkblick“. Z‘Hansrüedi-Rheinschiffahrt. Der Start zer Fahnuschwinger-DVD.
2005
Üftritt im Fernseh bim Donnschtig-Jass. Wieder es bizji meh Üftritta im Wallis.
2006
Üftritt aner Olympiade ds Turin. Gwinner im rro fer du bescht Walliser Schlager: 13 Stärna. Z‘Hansrüedi-Rottu-Schiffahrt und der legendär Üftritt am Openair Gampel zämu mit de A.F. Z‘Hansrüedi wird Obmann iner Weschtschwizerischu Fahnuschwinger-Vereinigung. Die CD „fAbisZät“ chunnt üssa.
2007
Lüüsbüebu-Single „Ich hä Durscht“. Üftritt im Fernseh (Fensterplatz) mit „Belalp, miis Paradies“. Z'Hansrüedi wird als Fahnuschwinger-Obmann in du Vorstand vam WSJV gwählt. Äs git es füüf(!)tägigs Zeedeetöififäscht in Natersch, Sittu, Gampel und an der Südrampi. Die CD „fAbisZät“ wird zämu mit dum eerschtu Konzärt va de ENDFRENZ gitöift. Das Konzärt wird üfgnu und en witeri CD ischt fertig...
2008
Ds Jahr faht ganz trüürig a: Biärdigung vam Vater Ruedi. Üftritt zämu mim Brüeder Landi in London bim Final vam A1-Grand-Prix. Fernseh-Üftritt in „Bsuech in Zermatt“ zämu mit de Red Hot Chilli Pipers. Z‘Hansrüedi‘sch ÖöschtriicherÜsflug an du Walchsee. ENDFRENZ-Üftritt ds Gräächu und die Wörld-(Tor)Tour in Fiesch, Saas-Almagäll und Natersch. Töifi va dr CD „Hudigääggeler“.
2009
Üftritt an der Schgii-WM in Val d‘Isére. Diräkt naa dr Fasnacht mit de „Üfheeru!!“ isch d‘Biärdigung vam Landi (Autounfall). Üftritt im Hopp de Bäse us dum Jodlerfäscht ds Dagmersellu. Die Fahnuschwinger-DVD ischt ändli fertig und wird am Jodlerfäscht in Natersch vorgschtellt und gitöift. Z‘Hansrüedi spillt am Openair Gampel.
2010
Ds Jahr va de absolute Höhepinkt.
Im Fahnuschwingu verchunnt Z‘Hansrüedi wägu der Arbeit aner DVD an der Eidg. Delegiertuversammlig en EJV-Standarte. Är gwinnt dr Weschtschwizer und der EJV-Wanderpriis. Hopp de Bäse „Extrawurst“ Spezial-Sändig uber Z‘Hansrüedi us Natersch im Schwizer Fernseh. www.srf.ch
Drii verschidini CD‘s chämunt üssa: „werminerchelti“ im Mai, „SODERSO“ im Oktober und d‘Live-CD „D‘Läifzeedee“ Ändi Novämber. Z‘Hansrüedi-Schiffahrt uf der Sâone und natiirli z‘letscht Fäscht wa Z‘Hansrüedi zweimal im total üsverchöiftu Zentrum Missione nomal cha üfträttu. Va de beidu Konzärt mit de ENDRENZ und de Lüüsbüebu wird no züesätzlich en DVD produziert.
Im Dezämber startut Z‘Hansrüedi mit schiiner Fröi Karin zer Wältreis per Schiff.
2011
Im Mai isch d‘Wältreis fertig und en Tag später gwinnt Z‘Hansrüedi nomal der Weschtschwizer-Wanderpriis im Fahnuschwingu - ohni iebu und mit zimmli Ubergwicht... Der Eidgenössisch Wanderpriis chan är nit verteidigu - är chunnt „numma“ zweite... D‘Stimmbänder heint schich zwar chennu erholu, aber länger als zwenzg Minüte singu geit no nit. D‘eerschtu Üftritta im Mai sind öi dementsprächunt!
Ab Juni geits de wieder es bizji besser. Super Üftritta mit de „ENDFRENZ“ u.a. ds Brig am Stadtfäscht und am Openair Gampel!
Kei öffentlichi Üftritta als Alleinunterhalter.
2012
Ds Jahr faht himmultrüürig a: Biärdigung vam Brüeder Erich. Churz druf scho d‘Fasnacht mit de „Üfheeru!!“ (...wa dr Erich mit schiinum Dudelsack natiirli uberall gfählt het...) Aner DV vam WSJV isch Z‘Hansrüedi als niwws Ehrumitglied g‘ehrt wordu. Mim singu geits länger je besser. Einzulni Lüüsbüebu und ENDFRENZ-Üftritta, d‘Produktion va dr CD „Gondo“ und d‘Schiffsreis va Paris nach Honfleur uf der Seine sind d‘Höhepinkt vam Jahr. ...und Z‘Hansrüedi spillt zwischudri öi mal wieder an öffentliche Aläss...
2013
Das sich ds Jahr va de grossu Ehrige! Am Neujahrsempfang verchunnt Z'Hansrüedi der Kulturpreis va dr Gmeind Natersch und am Burgertrüüch am Herrgottstag wird Z'Hansrüedi va dr Burgerschaft Natersch zum Ehruburger ernannt. Jede Natischer Burger verchunnt en CD mit Natischerlieder. Natersch, miis Derfji wird nöi als Jodel-Version üfgnu. Im Herbscht spielt Z'Hansrüedi ds Rom im Vatikan fer d'Schwyzer Gardischtu. ...und: Z'Hansrüedi macht definitiv öi wieder öffentlich Üftritta.
2014
Der Höhepunkt vom Jahr Sicht sicher die Z'Hansrüedi-Wanderwucha im Fieschertal. Da wird d'niww CD "1815" gitöift mit Konzärti mit de ENDFRENZ in Leiggerbad und Fieschertal. Und suschter: Wieder sehr vill Üftritta im Wallis und iner Üsserschwiz.
2015
200 Jahre Wallis! Wägu dem gits villi Angaschma im obere Teil vom Kanton. Der Üftritt va "Z'Hansrüedi ENDFRENZ" am Openair Gampel mit dem Jodlerklub "Aletsch", der Alphornbläsergruppa "Hüeru Güet", de drizäh Fahnuschwinger, der Schnitzulbankgruppa "Üfheeru!!", dum Ledl und dem Cupfinal-Pokal ischt bim fantastischu Publikum hüeru güet acho! Z'Hansrüedi ischt Gascht bir Sändig "Persönlich" (hie losu)
Grindig va der Vereinigung "Walliser Fahnuschwinger" - mu probierts mal ohni d'Alphornbläser...
2016
Äs geit witer: Wieder en schuppu Üftritta - fascht wie friener - und fascht wieder d'Stimm verloru... An vier Jodlerfäschti derbii (Wärbig fer ds Eidgenössischa ds Brig) Die Schifffahrt Rhein - Mosel- Saar im Oktober ischt üsgibüecht gsii und eismal meh en volle Erfolg gsii.
2017
Der Höhepunkt vam Jahr: Ds Eidgenössisch Jodlerfäscht in Brig! Z'Hansrüedi keert zum Gsamtobmann-Team va de Fahnuschwinger. Üsserdem geits uf en Jassreis va Amsterdam uf Basel und churz dernaa mit dum Zug uf Rom. En andre Höhepunkt: D'Karin verchunnt nomal en niwwi Niera! Dizmal en ganz Güeti!!
2018
Fernseh-Üftritta bim Samschtig-Jass us Saas-Almagäll und de öi no bim Donnschtig-Jass us Saas-Fee mit dum Andreas Gabalier. Ämzee und Zeedee-Töifi "Uhüerugüet" zämu mit dr Gmeind wägu "1000 Jahr Natersch". Im Herbscht der Jubiläumsüsflug uf Ridnaun im Südtirol (was öi wieder en niwwi Zeedee gigäh het). Üsserdem es paar Üftritta mit de ENDFRENZ und Ändi Jahr längeri Ferie mit dr Karin...
2019
Afangsch Jahr gits es Jubiläum: z'zwenzigscht Mal aner Fasnacht mit der Schnitzulbankgruppa "Üfheeru!!". Im Mai geits wieder uf Rom - wier derfe aner Vereidigung var Schwizergarda derbii sii. Äs git vier schöni Jodlerfäschti, en Single mit der niww Gruppe "D'Fahnuschwinger" und Start va dr "13er-Serie".
Und suschter: Witerhin villi Üftritta iner ganzu Schwiz.
2020
Iner Fasnacht natiirli mit de "Üfheeru!!" unnerwägs (inkl.Gastauftritt mit dum Jean-Paul Brigger). Va de Drachuteeter zum "Ehrenfasnächtler" ernannt. Die ganze Üftritta im Früelig sind wägum Corona-Virus abgeseit wordu . Öi im Mai die Reis uf Rom. Im Herbscht het die Z'Hansrüedi-Reis uf Oberbayern chennu durchgfiert wärdu. ...und de isch die zweiti Corona-Wälla cho...
Epis zum Fahnuschwingu: Will z'Jodlerfäscht ds Basel uf dsneegscht Jahr verschobu wordu ischt, wird es Büech uber ds Fahnuschwingu gschribu. Die 13er Serie müess es bizji waartu - wägu Covid wird das mim finanzieru es bizji knapp.
2021
Zwenzgeinuzwenzg faht nit güet a: Covid, kei Fasnacht und d'Karin ischt zimmli chrank gsii. Z'Eidgenössisch Jodlerfäscht ds Basel wird definitiv abgseit. Zum Glick cha mu ab Mitte Juni wieder embiz ga müsizieru. Es Riesutamtam hets gigäh wägum Video "Lang in du Üsgang gah"! Die 13er Serie wird abgschlossu. Natiirli mit ener Zeedee mit nigelnagelnöije Lieder und aner chleinu aber schöne Zeedeetöifi. Ändi Jahr geits nomal witer mit der füüftusch Wälle va dr Pandemie.
2022
Ändlich hei wier Covid uberstandu und äs geit fascht normal wieder witer! 5 (!) Jodlerfäschti, Fasnacht mit "Üfheeru!!", miini Giburtagsparty (mit 2 Jahr Verspätig), die Oschter-Romreis, der Helikopterflug uber d'Alpe mit Apéro mim Jonas im Bitschji (Merci Fredy!!), das CD-Gotta und Getti-Fäscht, der Fernseh-Üftritt mim Samschtigjass und wunderschööni Üftritta iner ganzu Schwiz. Eso macht Müsig machu en uhüeru Freid!
2023
Das isch es üssergwennlich schööns Jahr gsii! Wie immer en wunderschöni Fasnacht mit de "Üfheeru!!", es stimmigsvolls Eidg. Jodlerfäscht in Zug, en unvergessliche Flussreis uf dem Neckar und villi Üftritta (öi wieder mit de ENDFRENZ) im Wallis und einer Üsserschwiz. En ganz bsundri Ehr ischt mier aner Delegiertuversammlig vom Eidgenössische Jodlerverband passiert: Ich bi EJV-Ehrenmitglied wordu. Hä en hüeru Freid. Üsserdem häni am Openair Gampel zämu mit der Anna-Lisa Achtermann wieder derfu moderieru. Hä züesätzlich no en chliini Rolla bim "Tschugger" vercho - schii heint mi aber sofort la stärbu ;-)
Im Dezember häni dr grau Star miessu operieru. Hä wägu dem es bizji en längeri Pause gmacht.
2024
Scho Ändi Januar het d'Fasnacht agfangu. Ich hä derfu dr gross Bunt Aabu va de Drachuteeter moderieru, hä am Grossu Oberwalliser Umzug uf dum Wagu vom Baronat Rhodan derfu singu und natiirli mit de "Üfheeru!!" wieder en Super-Fasnacht kä. Zämu mit dem Marco Mazotti häni das Lied "Äs isch Fasnacht" produziert.
Vom Räscht vam Jahr lahni mi la uberraschu.