Z'Hansrüedi'sch Nius

August 2022

 

 

 

 

Z'neegscht Jahr ab dum 23. September 2023 sii wier wieder uf dum Schiff!

Die Flussfahrt ischt scho üsgibüecht

März 2022

 

 

 

Hoffuntli ischt jetz die Pandemie ändli verbii!

Ich hä jedufalls in letschter Zit sehr vill Afrage vercho! Merci an alli Verastalter wa mich immer no gäru tient büechu. Ich bi sehr dankbar, dass ich mit über Sächzig immer no cha und darf Müsig machu. 

 

Miine 60. Giburtstag häni wägu Corona nit derfu fiiru. Wier hole das am 19. März nah! Am meischtu Freid häni weni eswa darf ga Müsig machu - also scheich ich mier zu minum Sächzigschtu en Üftritt va mier sälber! ...und mit de ENDFRENZ. Das chunnt hüeru güet!

November 2021

 

 

Äs ischt wieder Winterzit und äs nachtut länger je schnäller i. Ich gfrewwu mich scho uf du Üstag!

Uber Ooschtru geits wieder mal uf Rom! Ds Schampi macht fer iisch en Super-Reis zwäg! Das chunnt ganz güet!!

Amäldu cha mu schich bis zum 30.11. bim Allet Jean-Pierre

September 2021

 

 

Wier sii scho mitti im Herbscht und äs isch losgangu mit de Üftritta. Öi wenn mu bi de meischtu Aläss numma mit dem Covid-Zertifikat cha cho: Ich bi richtig glicklich, dass ich wieder darf üfträttu!!

 

Und äs git öi wieder Nius va mier selber: En niwwi Zeedee mit sibzäh ehalb niwwu Lieder: 13x Niwws.

 

Die Zeedeetöifi ischt am Samstag, 23. Oktober ab de halbe Zwelfe. Im Campus Aletsch z'Natersch. Die Zeedee chamu ab sofort vorbschtellu. Fer numma 13 Franggu. Üsserdem häni in minum Lager es chliis Platzproblem vercho. Va jetzt wäg choschtunt alli miini Zeedees öi numma no 13 Franggu. Äs het, solang das het....

 

Alli öffentlichu Üftritta chasch hie naalüegu.

April 2021

 

 

 

Langsam geits wieder los... 

Ich hä no nie e soooo en längi Pause miessu

machu. Jetzt chämmunt zum Glick die eerschtu Angaschma der du Summer icha. Zum Biischpill der Üftritt am Rotsee im September. Alli öffentliche Üftritta wärdunt va jetzt wäg wider regelmässig naagitret. 

Hoffuntli hei wier jetzt es bizji Rüeh va der Pandemie...

Januar 2021

 

 

 

Äs ischt eifach en uhüeru Säich! Ich darf niene gah spilu - und eis vam Schlimmschtu: D'Fasnacht mit de "Üfheeru!!" hei wier öi miessu absägu. Wier Fahnuschwinger derfe no nit iebu (...hoffuntli gits ds Eidgenössisch Jodlerfäscht trotzdem...). Aber dsPositiva da dra: Jetz häni gnüeg Zit fer miini Karin und fer miini niww Zeedee fertig ds schriibu.

Ich gfrewwu mich eifach scho jetzu uf d'Fasnacht 2022!

November 2020

 

 

 

 

Ich hä scho wieder Üftrittsverbot wägu Corona. 

Jetz bini am experimentieru mit miinum Videoprogramm und hä versüecht en Müsig-Clip va "Natersch, miis Derfji" z'machu. Ganz eifach mim iphone. 

Lüeg sälbscht: Natersch, miis Derfji

 

 

Juli 2020

 

 

 

So wie das üsgseht, chunnt doch en zweiti Wälle mit dem Kowidninzäh. Also immer no gnüeg Abschtand hä - öi bi miine Üftritta. En güeti Leesig wääri die "Autokino-Veraschtaltige" wa jetz gat es Kombäck tient fiiru!

Ich spilu am 12. Juli alleinzig und am 26. Juli mit dr ganz Bänd "ENDFRENZ" uf dum Flugplatz Raron. Immer am Sunntag-Namittag. Äs git z'Ässu und z'Triichu und güeti Müsig us dum Autoradio. Es bsunners Erläbnis und en uhüerugüeti Idee va dene Organisatoore: Kultur-Drive hie im Wallis!

 

Nachtrag vom 6. Juli: Die Veranstaltung wurde verkürzt und meine Auftritte wurden abgesagt. Schade...

 

Juni 2020

 

 

Ds Schlimmschta va dem Corona-Sch... ischt appa verbii. Und so langsam aber sicher geits öi wieder mit miine Üftritta los!

 

Ich hä en uhammer Freid dasi wieder darf spilu. Öi mit meh Abstand!

 

Ich hä iner Corona-Zit es Büech uber ds Fahnuschwingu gschribu. - Nix wältbiwegunds, aber mit villne Bilder va friener und hittu. Es bizji eppis uber ds Fahnuschwingu, du Jodlerverband, die Wanderpriisa und es paar Ziile über alle miini Jodlerfäscht. Eiguntli häni das Büech numma fer mich gmacht - aber mu chasus hie bschtellu. Ganz chliini Üflag...

Bschtellformular 

 

März 2020

 

 Corona-Virus! Äs macht einum richtig Angscht, wemu gseht, dass en Virus d'halb Wältwirtschaft cha lahmleggu...

 

Vorläufig darfi öi kei Üftritta meh machu und müess abwartu.

 

Mu cha aber miini Müsig immer no ab Zeedee oder uf Spotify oder iTunes losu...  ;-)

 

 

 

Januar 2020

 

 

 

Üfheeru!! En komische Namu fer en Schnitzulbankgruppa - aber numma uf du eerschtusch Blick! Wa am Ändi va de Ninzgerjahr im Oberwallis es paar Schnitzulbankgruppe üfgheert heint, hei wier iisch gseit: Üfheeru mit üfheeru - wier fäh a mit Üfheeru. Sottigi Wortspilleriije sind öi in dischum Jahr im Programm derbii. Hoffuntli het dsPublikum genau so vill Gschpass wie wier sälber!

Wier Üfheeru sii:

Ami, Jorgesch, Hansrüedi (va Anfang a derbii- 21 Jahr)

Fredy (sit 20 Jahr derbii)

Gassi (sit 11 Jahr derbii)

Mario (ganz niww derbii)

Dezember 2019

 

 

 

Äs git vill einsami Lit uber Wienächtu. Und darum het mich der Ratko va miiner Stammbeiz "Ornavasso" ds Natersch am Heiligaabu angaschiert es paar Stunde cho Müsig machu. Uhüeru güeti Idee!

 

Üsserdem isch die dritt Zeedee va dr "13er-Serie" öi scho da: 13x Fröije ;-)

 

Ich winschu allen bsinnlich schöni Fäschttäg und en uhammer luschtige Rutsch ins Zwengzwenzg.

 

November 2019

 

 

 

So churz vor miinum Sächzigschtu, will ch es bizji chirzer trättu - wenigschtens bim Fahnuschwingu. 

 

 

15. Januar 2019

 

 

 

 Füüf Wuche häni derfu mit miiner Karin im asiatischu Gibiet derfu umenandergondlu und jetz geits wieder los!

 

D'Fasnacht steit vor der Porta. Wa wier üfträtte wisse wier scho lang - aber was wier de wärde singu, wisse wier no nit.

So wie jedes Jahr - immer alles im letschtu Momänt!

 

Iischi Gruppa gits jetz scho zwenzig Jahr! Und wemu miini Zit als Schnitzulbänkler bi de "Chääsmade", Red Rose Chruchtule" oder de "Giigeler" derzüerächnu tüet, bini jetz scho meh als vierig Jahr am Schnitzulbank singu und tegschtu. D'Zit geit...

 

Wier probiere uf jedu Fall es "aschtändigs" Programm uf d'Bei z'stellu!

 

...und fer die Reis uf Rom im Mai hets no es paar Plätz frii!!

 

 

28. November 2018

 

 

 

 

Jetzu is definitiv! D'Romreis 2019 gits vam 5. - 8. Mai! Genau zu der Zit wa d'Schwizer Gardischtu vereidigt wärdunt. Ds Schampi het es niwws Programm zämugschtellt. Alli wichtig Details gseehscht im Flyer. 

 

...und ich gah mit dr Karin in d'Ferie! d'letschtu paar Ferie hei wier immer miessu annullieru wägu der Gsundheit var Karin. Dizmal klappt's ganz sicher! Wier starte am 8.12. und chäme eerscht am 13.1.2019 zrugg.  

 

 

 

 

 

 

 

4. Mai 2018

 

 

 

Wier sii in de letschtu Vorbireitige fer das Fäscht am 19. Mai. Numma non es paar züesätzlichi Infos (äs het drum scho Fraage gigäh):

- Alli CD's, DVD's oder MC's chamu an dem Tag im Zentrum Missione wirkli fer

nummu 1000 Rappu chöifu. 

- Der Itritt am Namittag isch gratis, am Maabu ins Zentrum Missione choschtuts öi nummu 1000 Rappu

- Die CD "uhüerugüet" chamu scho jetz bschtellu - aber wird eerscht am 25. Mai üsglifrut.

- Ds OK va 1000 Jahr Natersch het öi Flyer und Plakaati gmacht: Merci villmal!

 

 

26. April 2018

 

 

D'niww "Z'Hansrüedi"-Produktion ischt im Chaschtu! ...und wenn die CD-Fabrik iru Termin tüet ihaaltu, de gits am Pfingschtsamstag, 19. Mai 2018 en uhammer schööni Kassettutöifi! Natiirli gits Zeedee öi...

Ab dum 25. Mai 2018 chamu de die Zeedee fascht uberall iner Schwiz chöifu. 

Will diz Fäscht unner dum Patronat va "1000 Jahr Natersch" steit, choschtut der Itritt am Maabu öi numma 1000 Rappu. Öi miini Zeedees und Ämzees wärdunt an dem Aabu fer 1000 Rappu verchöift. En Tag spääter choschtuntsch de wieder füüfuzwenzig Stutz. 

Der ganz Gwinn va dem Fäscht geit an die Pfarii Natersch, wa de das fer en güete Zwäck cha verteilu. 

 

Ich gfrewwu mich uf das Fäscht!!

 

 

 

 

17. Dezember 2017

 

Hientamal wärdunt Wienächtsmaarlini wahr und äs passiert iner Adväntszit richtigi Wunder!

E so es Wunder ischt mier diz Jahr passiert. Ds schönscht Wienächtsgscheich wa mu schich cha winschu! D'Karin het en niwwi Niere vercho! D'Operation ischt glungu und jetzt faht (eismal meh) fer iisch zwei es niwws Läbu a!

Üsserdem geit ds Zweitüüsigundachzäh diräkt mit eme Höhepunkt los. Am 6. Januar darf ich am Samschtig-Jass es Liedji ga singu. Derdussunt häni fascht alli Lieder fer d'niww Zeedeee fertig gschribu und öi d'Vorbireitige fer die Zeedee-Töifi am 19. Mai heint agfangu. 

 

Aber zeerscht chunt ja no Wienächtu. Wennt no keis Gscheich hescht: Wier hei no es paar Plätz frii fer die Südtiroler Plauschwucha im Herbscht! 

 

Amäldu cha mu schich diräkt bi mier. Ich schicke de Amäldigsformulaari züe...

 

2. März 2017

 

 

D'Fasnacht isch fertig! D'Üfheeru!!-Üftritta sind wieder mal uhammer luschtig gsii!  Jetz häni wieder es bizji Zit fer miis Büro in Ornig z'bringu. Hä jetzt gat der Flyer vercho va dr Romreis im Herbscht. Va jetzt awäg cha mu schich amäldu!