Tüümembrüf
Wenn diini Gschäfti nit rendierunt
und nur no Tubla hie regierunt
Wenn die Priisa explodierunt
Und Veganer imarschierunt
Chumm reg di wägu sottigum nit üf
häb diini Tüümembrüf
Wenn diine Bart nimme will spriessu
diini Stammbeiz will mu schliessu
dü chasch z'Läbu nimme gniessu
will mu der Wolf nit will erschiessu
Chumm reg di wägu sottigum nit üf
häb diini Tüümembrüf
Eso wies chunnt, chunnts so oder so
Wier jäisse alli uf hoochum Niwoo
Liggusch am Bodu - de stah ganz eifach üf
Und häb die Tüümembrüf
Wenn diini Ex-Fröi diis Gäld biigut
und diis Auto steckubliibut
Wenn der Meeresspiegul stiigut
der FC Sion nimme siigut
Chumm reg di wägu sottigum nit üf
häb diini Tüümembrüf
Um d‘ganzi Wält chascht nimme jettu
Schliessli willt dü dsKlima rettu
Uf die Strass tüesch dich achettu
Und müesch diis Hemmli sälber glettu
Chumm reg di wägu sottigum nit üf
häb diini Tüümembrüf
Eso wies chunnt, chunnts so oder so
Wier jäisse alli uf hoochum Niwoo
Liggusch am Bodu - de stah ganz eifach üf
Und häb die Tüümembrüf
Wenn dich der Radar het giblitzt
und mit dum Velo bisch dü gschtitzt
Diine Zahltag het mu kirzt
Mit Paprika diis Raclette wirzt
Chumm reg di wägu sottigum nit üf
häb diini Tüümembrüf
Eso wies chunnt, chunnts so oder so
Wier jäisse alli uf hoochum Niwoo
Liggusch am Bodu - de stah ganz eifach üf
Und häb die Tüümembrüf
Z'Härz
Vor längerer Zit scho
in Natersch uf d'Wält cho
und im Wallis hescht alles gseh!
Willt witer verreisu
um d'Wält chennu reisu
das welltisch dü länger je meh!
Ganz wit wäg ins Üsland
Auschtralie, Neuseeland
fer das hesch dr Läbtag lang gschpart
Jetz willt nimme tröimu
geisch wäg va deheimu
Jetz geisch dü uf ganz grossi Fahrt!
Aber z'Härz das blibt in Natersch
Isch mu öi ganz wit awäg
Aber z'Härz das blibt in Natersch
Numma hie is am rächtu Fläck
Hienta fählunt dier d'Worti
so vill schööni Orti
gits uberall uf discher Wält
Ja dü bisch z'biniidu
De Kollegu tüescht schriibu
Dass dier hie dsWallis nit fählt.
Dü willt no vill meh gseh
und meinsch dü chunnsch nie meh
zrugg zu diine Lit
Doch de fasch a tröimu
va dim deheimu
und de verchunnsch doch Längi Zit
Aber z'Härz das blibt im Wallis
Isch mu öi ganz wit awäg
Aber z'Härz das blibt im Wallis
Numma hie is am rächtu Fläck
Wier stosse a
Chumm wier stosse a uf iischers Läbu
und uf dich - da triichi öi
Dass wier im Wallis derfe läbu
und uf miini liebi Fröi.
Ich mag das langsam nimme keeru
was friener alls isch besser gsii
Sottigs tüet mi nimme steeru
iisch geits doch güet und wier sii frii!
Solang no d'Sunna am Himmul steit
und iischers Läbu immer witer geit
Solang no Fröinda hesch,
Kollegu hesch
Chas dier nit so schlächt gah
Chumm wier stosse aa:
Uf iischi Wält und iischers Läbu
Uf die Liebi und uf ds Glick
Dass wier im Wallis derfe läbu
wier gniesse jede Öigublick
Wier stosse a uf iischers Läbu
und uf dich - da triichi öi
uf das wa wier no derfe erläbu
und uf miini liebi Fröi.
Warum nur immer reklamieru
Warum bisch dü en Pessimischt
so chasch doch Läbunsfreid verlieru
Gniess doch z'Läbu so wie's ischt:
Solang no d'Sunna am Himmul steit
und iischers Läbu immer witer geit
Ob dü arm bisch
oder riich bisch
uf das chunnts nit druf a
Chumm wier stosse aa:
Uf iischi Wält und iischers Läbu
Uf die Liebi und uf ds Glick
Dass wier im Wallis derfe läbu
wier gniesse jede Öigublick
Wier stosse a uf iischers Läbu
und uf dich - da triichi öi
uf das wa wier no derfe erläbu
und uf miini liebi Fröi.
Wier läbe hittu - geschter isch verbii
und niemer weiss, was mooru de wird sii
So jetz nimm diis Glas
wier gäbe Gas
Wier fäh jetz richtig a
wier stosse nomal aa:
Uf iischi Wält und iischers Läbu...
Hey Schatzji
Hey Schatzji! Hä in miinum Härz es Platzji
das keert numma dier - weisch dü keersch zu mier.
Hey Schatzji! Hä in miinum Härz es Platzji
das isch nur der dich - weisch ich liebu dich!
Wartu scho miis Läbu lang
sie mit Angscht und sie mit Bang
hä gideicht ich bliib der Läbtag lang alleinzig
Da lüegut mich en Ängul a
und bliibut eifach vor mier stah
Sit dem sii wier zwei eifach unzertrennlich!
Hey Schatzji! Hä in miinum Härz es Platzji
das keert numma dier - weisch dü keersch zu mier.
Hey Schatzji! Hä in miinum Härz es Platzji
das isch nur der dich - weisch ich liebu dich!
Nur no Glick und niemeh Leid
Hei anenander sovill Freid
iischi Liebi die wird niemals meh vergah.
Der Himmul het mer en Ängul gschickt
Wier gniesse jede Öigublick
Diis Platzji blibt fer immer und ewig da!
Hey Schatzji! Hä in miinum Härz es Platzji
das keert numma dier - weisch dü keersch zu mier.
Hey Schatzji! Hä in miinum Härz es Platzji
das isch nur der dich - weisch ich liebu dich!
Xeit
Är het gseit - was schii het gseit
doch schii seit - was är da seit
heige schii ihm nit so gseit
är heiges ganz falsch witergseit
öi wenn är seit, dass schii das hei gseit
wie är das seit - heig s chii das nit gseit
Warum het är de gseit - was schii nit het gseit
Will sältu es Mannji - en Fröi richtig versteit!
Doch z'neegschtuschmal het schii de gseit
was är het gseit
Doch är seit - was schii da het seit
heige är ira nit esoo gseit
schii heige das falsch witergseit.
Öi wenn schii seit, dass är das hei gseit
So wie schii das seit heig är das nit gseit
Warum het schii de gseit - was är nit het gseit
Will sältu en Fröi - es Mannji richtig versteit
Dorfmüsikant
Ich weiss wan ich agfangu hä
vor uber 50 Jahr
Im Du Rhone iner Fasnacht
nei das ischt fascht nimme wahr
Mim Vater und dum Brüeder zämu
hei wier die ganzi Nacht
Fer alli Natischer so gääru
Ländlermüsig gmacht.
Und irgendwe de hän
ich de alleinzig witergschpillt
Hä nadisnah sogar
ganzi Fäschtzälti gfillt
Hä Lieder gschribu
cha de sälber CD's produzieru
doch öi hittu no tüen ich am liebschtu
ds Natersch müsizieru!
Sit 50 Jahr zieni umenand
als der Natischer Dorfmüsikant
Scho sit 50 Jahr und äs isch no nit verbii
ich bliibu eifach so - wie n ich immer scho bi gsii.
Dass das e so lang witergeit
das hetti nie gideicht
zum Glick het mier der Herrgott
sovill Gsundheit gscheicht
das ich darf witer Müsig machu
öi als Pensionäär
und üfheeru das will ich nit -
das fallt mier unkant schwär!
Denn ich hä der allerschönschti Job
was git uf discher Wält
Ich darf gah Müsig machu
und verchumm fer das no Gäld
Mier gähnt immer no die Griime
weni uf der Bühni bi
Wenn d'Chinder miini Lieder singunt
das fahrt gottlos i
Sit 50 Jahr zieni umenand
als der Natischer Dorfmüsikant
Scho sit 50 Jahr und äs isch no nit verbii
ich bliibu eifach so - wie n ich immer scho bi gsii.
Und geits öi nimme lang
mit Müsig und mit Gsang
D'Erinnrige die bliibumnt mier
der ganzi Läbtag lang!
Sit 50 Jahr zieni umenand
als der Natischer Dorfmüsikant
Scho sit 50 Jahr und isch das mal verbii
ich bliibu trotzdem so - wie n ich immer scho bi gsii.
Hüeruchnellitschatschatscha
Wenn miini Fröi mier ändli mal Üsgang git
de häni jedesmal en hüeru Freid
Numma hientamal da verstahni nit
was schii mier genau het gseit.
Het schii gseit ich selle nur zwei Bier ga näh
und am Zähni deheimu sii
oder het schii gseit ich soll zäh Bier gah näh
und eerscht am Zwei deheimu sii?
Diz isch der hüeru Chnellitschatschatscha
Der hüeru Chnellitschatschatscha
Diz isch der hüeru Chnellitschatschatscha
Der hüeru Chnellitschatschatscha
Miini Fröi mäldut mich bim Dokter a
Und der chlopfut ganz leid uf du Busch
Ich derfe niemeh glaffne ins Bett dri gah
Sittem schlaafi uf dum Gusch
Diz isch der hüeru Chnellitschatschatscha
Der hüeru Chnellitschatschatscha
Diz isch der hüeru Chnellitschatschatscha
Der hüeru Chnellitschatschatscha
Äs git kei Problemi wennt glaffne bisch
Sumi sägunt: Fer mich siiges z'spaat
Ich weiss das Alkohol kei Leesig ischt,
äs ischt es Destillat!
Diz isch der hüeru Chnellitschatschatscha
Der hüeru Chnellitschatschatscha
Diz isch der hüeru Chnellitschatschatscha
Der hüeru Chnellitschatschatscha
Ischdoglii
Der Sohn seit schüüch zum Papa. Jetz wirds ändli wahr
Miine Fröind und ich si appa - scho bald es Hochzitspaar
Die Uberraschig ischt ihm graatu - der Papa hets fascht gleit
En Maa willt dü heiraatu? - doch schliessli het är gseit
Ischdoglii - Ischdoglii
wenn das fer dich so stimmt de isch mier das öi glii
Ischdoglii - Ischdoglii
Solang dass ier zwei zämu wärdet glicklich sii
Ob männlich, wiiblich, sächlich - darfsch nimme unterscheidu
Mu cha schich jetz tatsächlich - fer schich sälber das entscheidu
Willt en Fröi oder en Maa sii - oder beides mitenand
Das müess nimme so klaar sii - blib eifach tolerant
Ischdoglii - Ischdoglii
willt dü männlich - oder wiblich sii
Ischdoglii - Ischdoglii
willt dü en Henna - oder Hahnu sii
Bischt en Henna - de chascht dü Eier leggu ohni z'Liidu
Bischt en Hahnu - de chascht uf jedi Henna druf ga stiigu
Schiissugliii - Schiissuglii
willt dü en Henna - oder Hahnu sii
Ischdoglii - Ischdoglii
hitzutags da cha mu beides sii
und hienta isch mu eppis zwischu dri
ganz ehrlich gseit mier isch das schiissuglii!
Mirco
Weni Durscht hä weisch wan ich de gah? ins Venezia, Venezia
Da träff ich de der Mirco a - im Venezia
Bivor dass ich hie bschtellu cha - im Venezia
keersch zeersch no lang schiis Bla Bla Bla - im Venezia
Mirco, Mirco
Chumm und bring ändlich es Bier
Mirco, Mirco
Ohni Bier verdurschte wier!
Mim Mirco brüücht mu vill Giduld - im Venezia
wier warte scho en Viertilstund - im Venezia
Är bringe iisch de scho es Bier - im Venezia
Wier selle nit so höiru hie! - im Venezia
Mirco, Mirco
Chumm und bring liislig es Bier
Mirco, Mirco
Ohni Bier verdurschte wier!
Ds Bier isch güet und iischuchalt - im Venezia
und wier merke de scho bald - im Venezia
Wier miesse no eis bschtellu hie - im Venezia
Wier briele: Mirco no es Bier!! - im Venezia
Mirco, Mirco
Chumm und bring hie no es Bier
Mirco, Mirco
Ohni Bier verdurschte wier!
Hildi
Die BodyBody bodybildi Hildi
Tränierut ire Body wie en Wildi
Dr ganzi Tag da schwitzut schii im Fitness-Studio
Und am Morgu vor de Achte ja da ischt schii scho
am Boxu, an de Hantle an de 100 Liegustitz
am Rüedru und am Löifband und de Yoga no embiz
Am Namittag am Tschoggu, mit dum Velo unnerwägs
Hey Hildi - jetzu längts!
Hey Hildi
Chumm Tschilldi
Tschilldi Hildi - dü willt sportlich bliibu
Tschilldi Hildi - tüe nit so ubertriibu
Tschilldi Hildi - wier tie deheimu bliibu
Tschilldi Hildi - de chenn wers zämu triollolodijee
Vater
Dü bisch miis grossi Vorbild gsii
wa dü bisch - häni öi wellu sii
sigs bim schaffu, sigs bim Laffu
oder sigs bim greeschtu Fäscht
wan dü derbii isch gsii, de isch mu nie ins Näscht
Jessus was hei wier alles erläbt
dü hesch mi gleert, wie mu dsLäbu läbt
Wier hei glachut, wier hei gflännut
und ich hä gleert daderbii
dass mu immer mit eim sälbscht soll zfridu sii.
Vater, Kolleg und öi Frind
Eine wie mu keine suschter find
uf dich häni chennu zellu
gliich was öi passiert
und mit dier häni so gääru müsiziert
Öi wenn dü jetzu nimme näbs mier steisch
öi wenn mier diini Meinig nimme seisch
Ich keeru dich, ich gschpirru dich - nei das geit nie verbii
will dü fer immer en Teil va mier wirsch sii
Vater, Kolleg und öi Frind
Eine wie mu keine suschter find
uf dich häni chennu zellu
gliich was öi passiert
und mit dier häni so gääru müsiziert
No hittu hän ich en hüeru Freid
Wenn irgendepper chunnt und zu mier seit:
Der Zbindi Rüedi und Z'Hansrüedi - en ähnlichi Person
Wie der Vater - so der Sohn
Miini Stimm
Dü - ich wellti dier hittu mal eppis sägu
Wier zwei - wier keere eifach zämu!
Ich hä di gääru - genau so wie dü bisch
öi wenn dü diis Elter scho zimmli gschpirrsch
Weisch wier zwei - hei soo vill derfu erläbu
und hientamal wenn dü fascht nimme hesch mägu
häni di mitgschreckt und strapaziert
und dü hesch das fascht immer akzeptiert.
Im Stich glah - hesch dü mich nie
dü keersch zu mier und ich zu dier
Ohni dich wääri miis Läbu läär und schlimm
ich sägu dier merci villmal - dier - miiner Stimm!
Ich hä ghöirut, gibrielut und gsungu dr ganzi Tag bis teif in d'Nacht
und hä daderbii ganz sältu mal en chliini Pause gmacht
Klar dass miini Stimm het glittu, die het gar kei Freid
Wenn die mit mier chennti redu, de hettisch sicher gseit:
Häb doch z'Gläff züe!
Ich weiss doch derdussunt sälber wie miini Stimm jetzu tüet teenu
fer mich isch das doch gar kei Grund mim singu jetz z'üfheeru
Sumi Lit die heint en hüeru Gschpass und sumi en hüeru Freid
öi wenn ds Publikum mier hientamal ganz ehrlich seit:
Häb doch z'Gläff züe!
Miini Stimm die teent so dräckig - wie es Saxofon
Und ich merku: Nei ich träffu säältu meh en Ton
Ich hä dr ganzi Läbtag lang miini Stimm zimmli gibrüücht
Hä schi giplaagut und forsiert und darum teent schii jetz so rüüch
Ich wellti witersingu solang dass d'Stimm das no vertreit
und hoffu daderbii dass mier nie meh epper seit:
Häb doch z'Gläff züe!
Lah los
Dü hesch no länger wellu bliibu
doch jetz isch Zit zum gah
Dü willt nit länger liidu
das miesse wier verstah
Dü firchtusch di hesch mier mal gseit
va dem wa da no chunnt
Dü weisch nit wie das witergeit
naa diiner letschtusch d'Stund
Lah riewig los
Leg diis Wärchzig us diine miede Händ
Lah riewig los
En nöije Afang - chunnt naa jedum Änd
Lah riewig los
und alls wa schwäär isch gsii wird fäderliecht
Lah riewig los
Gang us dum Schattu dri ins helli Liecht
Diis Boot ischt jetz im Hafu
und nimme z'mitsch im Meer
Nimme kämpfu nur no schlaafu
und gar kei Sorge meh
Wenn dü chascht d'Öige schliessu
und bischt ändlich bireit
de wärdunt Träne fliessu
öi wenns dier de besser geit.
Lah riewig los
Leg diis Wärchzig us diine miede Händ
Lah riewig los
En nöije Afang - chunnt naa jedum Änd
Lah riewig los
und alls wa schwäär isch gsii wird fäderliecht
Lah riewig los
Gang us dum Schattu dri ins helli Liecht